Tá Treoirlíne nua Uimh. 2025/3 eisithe ag Cathaoirleach an Bhinse Achomhairc um Chosaint Idirnáisiúnta maidir le hAchomhairc ó Iarratasóirí Leanaí . Leagtar amach san Acht um Chosaint Idirnáisiúnta 2015, i IR Uimh. 116 de 2017 – Rialacháin an Achta um Chosaint Idirnáisiúnta 2015 (Nósanna Imeachta agus Tréimhsí le haghaidh Achomhairc) 2017 agus i IR Uimh. 62 de 2018 Rialacháin an Aontais Eorpaigh (Córas Bhaile Átha Cliath) 2018, nithe éagsúla a bhaineann le breithniú achomhairc os comhair an Bhinse Achomhairc um Chosaint Idirnáisiúnta. Tá sé beartaithe leis an Treoirlíne seo an tAcht agus na Rialacháin a fhorlíonadh agus ní iad a chur ina n-áit. I gcás coinbhleachta, beidh tosaíocht ag forálacha an Achta nó an Rialacháin ábhartha ar an Treoirlíne seo. Cuirtear an Treoirlíne seo in ionad Threoirlíne Uimh.: 2017/5 an Chathaoirligh, Achomhairc ó Iarratasóirí Leanaí dar dáta an 20 Aibreán 2017. Eisítear an Treoirlíne seo de bhun alt 63(2) den Acht.
Baineann an Treoirlíne seo le gach Achomharc a bhaineann le Leanbh a n-éisteann an Binse leis, agus le Leanaí ag gach céim dá n-idirghníomhaíocht leis an mBinse, ón gcéim réamhéisteachta go dtí go ndéanann Comhalta den Bhinse cinneadh.
Tá an treoirlíne seo bunaithe go príomha ar 'Lámhleabhar agus Treoirlínte maidir le Nósanna Imeachta agus Critéir chun Stádas Dídeanaithe a Chinneadh' de chuid UNHCR, 'Treoirlínte maidir le hÉilimh Tearmainn Leanaí faoi Airteagail 1(A)2 agus 1(F) de Choinbhinsiún 1951 agus/nó Prótacal 1967 a bhaineann le Stádas Dídeanaithe' arna n-eisiúint an 22 Nollaig 2009, chomh maith le 'Tuairimí Ginearálta Uimh. 12 (2009) de chuid Choiste na Náisiún Aontaithe um Chearta an Linbh maidir le ceart an linbh a bheith cloiste' (a leagann béim ar an gceart atá ag gach leanbh a dtuairimí a chur in iúl go saor agus go mbreithneofar na tuairimí sin agus go dtabharfar aird chuí dóibh de réir a n-aoise agus a n-aibíochta) agus 'Tuairim Ghinearálta Uimh. 14 (2013) maidir le ceart an linbh a leas is fearr a chur san áireamh mar phríomhbhreithniú' (a leagann béim ar an bhfíric go gcaithfear leas is fearr an linbh a chur san áireamh agus cinntí á ndéanamh a théann i bhfeidhm ar leanbh). Tugadh aird freisin ar 'Treoir Oibríochta maidir le Gníomhartha an Chláir Chroí um Chosaint Leanaí' (Eanáir 2024) de chuid UNHCR, 'Treoir phraiticiúil maidir le leas is fearr an linbh i nósanna imeachta tearmainn' (2019) de chuid EASO, agus 'Treoirlínte Nós Imeachta um Leas is Fearr: Measúnú agus Cinneadh a dhéanamh ar Leas is Fearr an Linbh' de chuid UNHCR (Bealtaine 2021).